Il fuart moviment di emigrazion stagjonâl viers la Europe centrâl e orientâl al va dutun cuntune emigrazion che a cjape la tendence di deventâ definitive e che a smire a jentrâ in posses di tiere par stabilîsi e che rispiet ae prime si manifeste in Friûl in maniere ungrum plui limitade.
Al è il câs, par esempli, dai nertans e dai cassans che ator dal 1880 si trasferissin in Slavonie, a Plostina, ma ancje dai contadins di Mieçmont di Polcenic che intai stes agns a rivin a Monte Belo intal Rio Grande do Sul in Brasîl.
La sielte di emigrâ, in ogni mût, no je dome la rispueste a un evident e simpri cressint discuilibri jenfri bens locâi e popolazion, ma e rispuint pluitost a strategjiis economichis pensadis par ben che a diversifichin lis tipologjiis dal redit, a slargin il teritori di riferiment, e a deventin cjantons di relatîf privilegjio intes citâts e tai mistîrs dulà che i emigrants a vevin concuistât impuartance e vantaç.
Il "lâ pal mont" al rapresente dispes une prove clare dal furlan di volê superâ, culis sôs fuarcis e i siei braçs, une situazion di vite ritignude simpri mancul sopuartabil.
Jenfri lis causis plui impuartantis che dal 1882 al 1884 a puartin la int a emigrâ – viers l'Argjentine e il Brasîl soredut –cuasi ducj i Sindics de provincie di Udin (che comprendeve ancje la provincie di Pordenon istituide dal 1968) a indichin la volontât di miorâ lis condizions di vite cirint “miôr fortune”.
La seconde metât da '800 a presente, duncje, un cuadri de emigrazion cambiât cuasi dal dut, e cundizionât soredut de mondializazion de economie.
Dentri di une stesse comunitât i furlans a definissin consapevolmentri stradis di emigrazion diviersis, a previodin progjets di vite alternatîfs che a son il risultât dal confront dialetic jenfri lis diviersis pussibilitâs ufiertis.
Une sielte che e je in fin dai conts leade a rêts di parentât e di paîs che i emigrants a rivin a delineâ ma ancje ai mûts di reclutament e ae propagande migratorie che a prevâl dentri di une comunitât.
Italiano
English
Furlan