In chescj ultins agns, il Friûl al è avonde cambiât:lis rivadis a àn cjapât il puest des partencis, chei che a son tornâts dongje e i gnûfs imigrâts a àn cjapât il puest dai emigrants.
Di tiere di emigrants, il Friûl al è deventât teritori di lavôr par gnove int che, come che a vevin fat i nestris, a cîr lis prospetivis di vite che il propri paîs nol pues ufrî.
Par i furlans lis lôr stagjons di migrazion a son stadis sieradis in te memorie par plui individuâl, parcè al somee che la storie sedi stade biel a pueste gjavade di ment de cussience comun.
Fats che, a viodi il ben stâ di vuê, a somein lontans e estranis come estrani e lontan al pâr il Friûl cressût fûr dai confins. Un Friûl diviers che di râr al cir i onôrs, ma pluitost il fevelâ cuntune tiere verementri divierse di chê che a si ricuarde, ben savint di fâtint part dome afetivementri parcè aromai il so puest al è intes patriis di adozion.
Emigrants, furlans, intal mont, comunitâts di fûr e diasporis a son nons che a mostrin une secuence viers une progressive afermazion, ma che a mostrin intal stes timp ancje un procès di slontanament de patrie di origjin, simpri plui fuart e segnât.
Sorecognons che a lôr dispès ur vadin strents parcè che la percezion di apartignî a une entitât, une uniche culture e je plui svariade e complicade. Dispès lis identitâts si messedin (ma no si scancelin) fasint une sorte di messedot indulà che lis parts a son cussì ben tiessudis che no si puedin dividi cence che a deventi cognossibil il dut.
A conts fats o si cjatìn in man un risultât positîf no dome parcè i furlans emigrâts e lis gjenerazions vignudis daspò a fasin part normalmentri des societâts li che a àn implantât lis gnovis lidrîs, ma ancje parcè a puedin contâ sore diviersis culturis, sore plui lenghis, sore plui orizonts.
Di cheste ricjece àn fat tesaur, e ancjetant al varès di fâ il Friûl, premetint che cui siei emigrants al intint tacâ un rapuart paritari.
Ancje lis numerosis culturis che a puartin i imigrâts a rapresentin par il Friûl une pussibilitât di cressite e di confront.
Tornâ a lei i faliments e i sucès de nestre emigrazion, al podarès judâ a capî ancje chest altri Friûl, diviers dal stereotip, che biel planc al deventarà ancje lui furlan dal dut.
Italiano
English
Furlan