Intal 1565 Jacopo Voleson di Manià al riferis che lis popolazions cjargnelis "fanno diversi traffici coi tedeschi e come gente industriosa si partono dal loro paese in gran numero e vanno a procacciarsi il vitto in luoghi lontanissimi, di maniera che oramai se ne trovano per tutta l'Europa e la propria arte è tessere panni di lana, ma più di lino, nel che sono eccellenti e rari".
("A fasin diviers trafics cui todescs e, tant che int industriose, a lassin il lôr paîs par procurâsi di vivi in lûcs lontanissims, in maniere che aromai si ‘ndi cjate ator par dute la Europe e il lôr mistîr al è di intiessi peçots di lane, ma par plui di lin, dulà che son ecellents e rârs").
La emigrazion tradizionâl e partis de mont furlane soredut viers la Carinzie, la Stirie, il Salisburghês, la Baviere e l'Istrie ancje se altris nazions dal bacin danubian, cualchi localitât dal Venit, Triest e Vignesie a rapresentin direzions
frecuentis e solitis.
Viers i prins agns dal 1500, prime che Jacopo da Voleson al scrivès il sô Descrittione della Cargna nel Friuli, i cramârs di Claut, Nert e Cimolais a proviodin di vivi vendint stecjutis di len di peç bagnât cu la pês (clamadis lum).
Un frecuent lâ e vignî che vie par l'invier, al menave jù i montanârs viers lis planuris, ma che nol prejudicave il lavôr dai cjamps, che a vignivin fats des
feminis restadis a cjase. Vignesie, la Basse Furlane, il Trevisan, il Vicentin e daspò Triest e la Istrie a saràn lis destinazions plui sielzudis a partî dal '600 e
simpri di plui intai secui indenant seont modalitâts, timps e itineraris che a cambiaran di paîs a paîs.
Lis primis testemoneancis di une emigrazion di mistîr e no dome tignude intal cercli di cualchi episodi particolâr, si cjatin intal Friûl di Soreli a Mont par merit dai terazîrs de Alte Planure dal Pordenonês.
La presince a Vignesie si fâs fuarte dilunc dut il '600 e il '700 e i furlans a àn vût mût di fâsi cognossi pe lenghe e pes usancis intai Sestrîrs di Castello e Dorsoduro, Campo e Fondamenta dei Furlani, Campiello delle Furlane e Fondamenta e Corte delle Furlane.
Italiano
English
Furlan