Intal Friûl ocidentâl, jenfri i agns '60 e '70, il cressi de industrie mecaniche leade ae citât di
Pordenon al ferme il passaç stagjonâl viers i Paîs europeans: la pedemontane a fâs cumò di bacin di lavoranzie de concentrazion industriâl pordenonese.
Tache a nassi un marcjât regjonâl dal lavôr, che al permet di vê une cualchi mobilitât sociâl cence scugnî lâ tal forest.
In chest mût e finis la emigrazion fuarçade, l'emigrazion "a timp e fin determinât".
Il Taramot dal 1976 nol cambie la tindince dal rientrâ, ma al permet invezit un gnûf inseriment par lis professions leadis ae edilizie.
Intai ultins agns, i lavoradôrs, che, par periodis limitâts tal timp, a van tal forest daûr des impresis talianis, a an cjapât il puest dai vecjos migradôrs.
La emigrazion "di cantîr" o "tecnologjiche" che a nas dai paîs dal Friûl ocidentâl e à come destinazions principâls lis Africhis, la Americhe Latine, il Lontan Orient, i Paîs Arabos.
Il nivel tecnic e retributîf, numars scjars e garanziis sociâls, no permetin il paragon culis esperiencis precedentis.
Al lavôr talian fûr de patrie i furlans i dan un contribût rilevant, no dome tant che operairis, maestrancis o professioniscj, ma ancje come parons o dirigjents des industriis cognossudis e saldis.
Il rientrâ di cierts paîs europeans o latin-americans, soredut de Svuizare, dal Venezuela, al Brasil e de Argjentine, al è storie di vuê.
De Svuizare a si rientre par passâ in patrie i agns de pension, dai Paîs de Americhe Latine la partence e je leade a motîfs di sfortune economiche e sociâl.
Par cui che al rive daspò agns di lavôr tal forest, il tornâ al pues dispès jessi paragonât a une gnove emigrazion.
Par i zovins latins-americans, il Friûl cognossût no simpri al coincît cu la tiere che i gjenitôrs e parincj plui vielis ur àn descrit.
Italiano
English
Furlan