Dilunc dut il'700 la emigrazion a no cjape dome une proporzion plui grande, ma a tache a deventâ di mistîr, soredut in te zone montane e inte pedemontane, diversificantsi di lûc a lûc: scalpelins, minadôrs, faris, boscadôrs, cjarpentîrs intes vals dal Livence al Tiliment, sliperârs inte Val Tramontine, personâl di albierc e fachins inte pedemontane ocidentâl.
Il slontanâsi dilunc dut il 1700, par cualchi mês ad an o par cualchi stagjon, di intieris
fameis di Clausêt, di Vît e dal rest dai paîs de Val d'Arzin, e de Val Tramontine, che si son
trasferidis in Cjargne pes ativitâts de malghe e je prove di une emigrazion segnade dai
spostaments ancje dentri de regjon Alpine.
La seconde metât dal '700 e la prime dal '800 a segnin un moment di passaç li che il lâ vie pal mont, in mût diviers di prime, si concentre tal scomençâ de Vierte, "nella stagione in cui la terra più abbisogna di braccia: emigrazione dannosa – al dîs Giovanni Domenico Ciconi tal 1845 – perché non aumenta, anzi scema, le cognizioni agricole degli emigranti, alletta il viver girovago, profitta poco dinaro, e rallenta i cari vincoli della famiglia e della patria". (“inte stagjon li che la tiere e à plui dibisugne di braçs: emigrazion danose - al dîs Giovanni Domenico Ciconi tal 1845 – parcè che a no slargje, anzit a disvuede, lis cognizions agricolis dai emigrants, a invoie il vivi vagabont, a puarte pôc profit, e a dismole i cjârs vincui de famee e de patrie”).
Francesco Pelizzo miedi chirurc di Spilimberc, in tes sôs Notizie statistiche della provincia del Friuli dal 1846, al pense che in Friûl la emigrazion momentanie a nassi de volontât di miorâ la situazion economiche, e no de dibisugne di gjavâsi de azion dai “elements
topografics”.
Seont Pelizzo i furlans a emigraressin par sielte.
Italiano
English
Furlan