Personalitât emblematiche dal lavôr furlan, Giacomo Ceconi di Montececon, nassût a Pielunc dal 1833 al è dome une jenfri lis tantis esperiencis di riesside sociâl e economiche che la emigrazion no dome e je complene ma par plui des voltis e je ancje la cause.
Jenfri Votcent e Nûfcent a son tancj i imprenditôrs furlans che a fasin vie pal mont grandis costruzions di architeture e di inzegnarie, di feroviis, di fognaduris, di lavôrs portuâi, di cjanâi, di stradis. Muredôrs, taepiere, scarpelins o manoâi a van, soredut intai paîs de Europe centrâl, tai cantîrs dai impresaris che par solit a son dai lôr stes paîs.
I bogns risultâts che i Furlans e i lôr fîs o nevôts a otegnin in emigrazion o intes societâts li che a son deventâts aromai part, a no si fermin a ambits ristrets.
Syria Poletti, par esempli, che di Sacîl e rive in Argjentine jenfri i agns trente e Cuarante, a je une des plui impuartantis scritoris pe infanzie, mentri il mestri Antonio Cossettini di Davian al metût in pîts, viers il 1870, la "Silvio Pellico", une jenfri lis primis scuelis talianis fûr di Buenos Aires.
Lis secondis e lis tiercis gjenerazions di Furlans, nassûts, cressûts e scuelâts intal forest, a deventin cognossudis come insegnants intes universitâts, managers e professioniscj intai cjamps plui diviers de culture, economie, politiche, risultât di une plene integrazion tes societâts che vevin dât acet ai lôr gjenitôrs, vons e bisavons.
Lis grandis aziendis che, intal cognon furlan che a puartin, a documentin une strade personâl premiade de fortune, a son cetantis, de Europe aes Americhis, de Australie al
Sud Afriche.
Segn di presince furlane tai cinc continents.
Olmis tant meretadis cuant chês dai puars emigrants di Navarons che, jenfri Votcent e Nûfcent, "a mangjavin pan e curtis par podê mantegni la lôr famee" restade in paîs.
Italiano
English
Furlan