"La cundizion de femine no je nuie buine in ducj i comuns dal distret ma, stant lis duris fadiis che i tocje sopuartâ, e je pardabon miserabile intai comuns di Frisanc, Andreis, Barcis, Cimolais e Nert, li che je obleade a cjoli la volte des bestiis di cjame e fâ viaçs di cetancj chilometris puartant su pes spalis cjamis di 60 chilos" al scrîf dal 1874 l'avocat Fovel.
Lis feminis de alte planure dal Pordenonês, soredut chês che a vegnin de mont, e "vadin fûr pal mont" a vendi, bais e operaris, a contribuissin cul lavôr fûr cjase a miorâ la economie dumiestie, pe grande part fate di miserie, e chest bielzà de fin dal Votcent.
Ma bielzà de fin dal '700, par esempli, lis Tesanis a lavin dispes al "Pio Luogo" di Vignesie par cjapâ su i frutins bandonâts, cjapant in cambi une piçule paie.
Un mistîr, chel des bais, che intal Friûl a devente simpri di plui un salvament par tantis
feminis no dome de mont ma ancje de planure.
La grandissime partecipazion des feminis ae emigrazion intai prins agns dal Nûfcent no plee purpûr la part impuartante che, vie vie lôr si vuadagnin inte gjestion de organizazion de cjase e de economie de famee par cause e par gracie de emigrazion momentanie dai oms.
Inte emigrazion transoceaniche la part de femine a cjape valôr no dome cuant che si rivave, ma ancje intal moment che a si veve da sielzi il lûc viers l'Argjentine o il Brasîl.
Tai prins agns dal Nûfcent, ma soredut jenfri i agns Vincj e Trente, al cjape impuartance il fat che tantis feminis a lassin lis fameis par lâ a servî intes grandis citâts de Italie, Rome, Vignesie, Napoli, Milan, Padue, Gjenue.
Tant che emigrantis o tant che feminis di emigrants dongje cjase o lontan, tes altris regjons de Italie o ancjetant in paîs, a cjase o in filande par esempli, il lavôr che al fâs lâ vie l'om di famee, la fadie de femine, di chê che a reste e di chê che a va, a contrassegne lis grandis trasformazions e il dûr progrès sociâl e economic che, soredut fint ae Prime Vuere Mondiâl, a cjapin il Friûl in ducj i siei aspiets.
Italiano
English
Furlan