Emigrants di profession: stagjonâi tes Gjermaniis

Sezion 3 di 12   pagjine prime - pagjine dopo

Il svelt svilup des citâts e des stradis e feroviis, sucedût inte Europe centrâl vie pe seconde metât dal '800, al clame propit inte buine stagjon dute la fuarce-lavôr dai oms de zone montane orientâl.

I mecanisims di atrazion viers i Paîs cuntun grant svilup capitalistic de Europe danubiane a saran plui fuarts di chei di espulsion che, fint in chel timp, a vevin caraterizât la mont furlane e che a vevin puartât aes piçulis migrazions ordenaris intal "gjenar di vite" des popolazions di mont.

I lavôrs tai cjamps a deventin dispes scjars e a non son in grât di sodisfâ lis esigjencis dal invier e i bisugns deventâts simpri plui larcs.
La belance economiche duncje e je simpri plui instabile, no dome par cause dal cressi de popolazion e dal impuariment de mont, ma ancje pe pression fiscâl dal Stât talian.

Chel che a si cjapave te emigrazion momentanie, al devente cumò il pont di partence de economie montane.
I bêçs vuadagnâts a finanziin sot forme "di impuestis diretis e indiretis" la costruzion des infrastruturis, ma soredut a tegnin su la economie des fameis restadis in paîs.

Inte mont furlane, adun cui muradôrs, pichepieris, taepieris specializâts, che van daûr i grancj lavôrs fintremai inte Russie, a convivin ancje stagnins, ucefuarfis, geârs, sedonîris e"traficants" di ogni gjenar.

Si trate, par altri, di mistîrs fats di categoriis di int plui debile inte jerarchie lavorative, come lis feminis, o ben da chês plui cuntrariis a adatâsi intal paîs a lis trasformazions che vie vie a cjapin impuartance tal marcjât dal lavôr e che a àn la tendence a scancelâ lis produzions artesanâls, dutis che a proviodin di sodisfâ i bisugns di cjase di une economie autarchiche e comunitarie.