Il sclopâ de Prime Vuere Mondiâl al siere definitivementri lis destinazions viers la Euorope
centri-orientâl.
Il tornâ dongje obleât, a scomençâ dal Lui dal 1914, di su par ju 80.000 lavoradôrs stagjonâi dai paîs dal bacin danubian a presente carateristichis dramatichis. La fin de vuere a vierç cun fuarce i marcjâts de France, Ingletiere, Belgjio, Olande, Svuizare e Lussemburc.
Di la dal ocean, i Stâts Unîts, e New York specialmentri, a son la destinazion preferide par i furlans de Val Midune, di Fane e di Cjavàs, mentri Bridgeville, dongje Pittsburg, e je une piçule Frisanc. La Australie, e Sidney in particulâr, a ricevin invezit tancj furlans origjinaris di Top di Travês.
Par chei di Cordenons il rivâ a Buenos Aires jenfri i agns Vincj e Trente a previôt l'incuintri cuntune altre Cordenons, "in Argjentine nissun paîs dal Friûl al à tancj emigrants tant che Cordenons" al dis don Luigi Ridolfi in tal 1949.
Une rêt che a fâs pensâ, ancjemò, a une complementarietât o a rapuarts privilegjiâts jenfri lûcs di partence e di destin. Un leâm che al cjape dentri, in chest câs, Viarèit, Sclavons, Romans, Massèlu, La Plassa, San Jacu, San Zuan, Sarviel, Cortine, la Cal, Villasgrafa cun Avellaneda, Sarandi, Villa Dominico, Wilde, Don Bosco, Quilmes, Bernal, a Buenos Aires.
In France, lis campagnis de Aquitanie, il dipartiment Lot-e-Garonne in particolâr, la perifarie di Parîs e la Lorene a rapresentin un pont di rivade frecuent. Passât il 1924, pratichementri ducj i paîs che a ricevin talians e furlans a stabilissin di regolâ lis jentradis.
Il fassisim al acete cheste politiche come une sielte autonome, ma passât il 1927 il Guvier adote une vore di restrizions intal dâ fûr passepuarts par i emigrants lavoradôrs.
L'emigrazion permanent no jere ben viodude; chê momentanie a scugnive jessi regolade seont determinâts limits e cundizions.
Tancj furlans a pontin alore viers lis citâts de Lombardie e dal Piemont, soredut come muredôrs, i trasferiments jenfri il 1931 e il 1932, viers la Cirenaiche e, plui tart viers la Afriche Orientâl Taliane, a son plui misurâts, invezit lis partencis viers lis tieris di bonifiche dal Agro Pontin e di Carbonie, di Mussolinie di Sardegne (vuei Arboree) e dal Macarès a somein interessâ plui la planure pluitost che la pedemontane o la mont dal Friûl ocidentâl.
Italiano
English
Furlan