Lis Prospetivis dal Friûl ae fin de Seconde Vuere Mondiâl a son par cualchi aspiet compagnis di chês dal novembar dal 1918.
Il scugnî emigrâ nol cambie come destinazion e dificoltât.
Intai prins agns ogni lûc al somee bon e la int e cjape la strade de France, Belgjo, Stâts Unîts, Argjentine, Canadà, Australie e Sud Afriche.
La uniche novitât e je rapresentade dal Venezuele: intal Friûl Ocidentâl a interesse soredut la Val d'Arzin, la Val Midune, la Val Cose e paîs tant che Spilimberc, San Zorç, Voleson e Darzin.
Tal seont dopo vuere la cjarte des destinazions e dai mistîrs nol somee che a cambi tant.
Dispès a son chei dal stes paîs che tai agns Vincj a si trasferissin in Paîs tant che la France, il Belgjo, i Stâts Unîts o l’Argjentine che a fasin di pont di riferiment par chei che a emigrin finide la Seconde Vuere Mondiâl.
Il 20/06/1946 il Guvier talian al firme cul Guvier dal Belgjo il prin pat bilaterâl di emigrazion stipulât de Italie passade la Vuere Mondiâl.
Lis Autoritâts Talianis si impegnin a mandâ intes minieris dal Belgjo 50.000 minadôrs (2.000 par setemane).
Il Guvier dal Belgjo, par cont so, al varès vendût ae Italie fint a 200 chilos di cjarbon al dì par emigrant.
Intal Friûl Ocidentâl i minadôrs a vegnin soredut de Valceline, Barcis, Montreâl, Çopule, San Martin di Cjampagne.
Lis condizjons di Lavôr a son pesantissimis, la qualitât des cjasis dispès scjadente: i minadôrs a stan intes barachis di lamiere prime ocupadis dai presonîrs di vuere.
Tancj a son i furlans che si inmalin di silicosi: il respirâ dal polvar di cjarbon e di clap a siere i polmons dai minadôrs comprometint lis funzions dal respirâ.
Jenfri i agns '50 e '60 i vantaçs economics dal lavôr stagionâl in Svuizare e, un pôc mancul, in Gjermanie a tirin un grues numar di lavoradôrs furlans e talians: a van par solit a fâ lavôrs refudâts de int di chei paîs, ocupant chei puescj che chei dal puest a lassin libars.
Svuizare e Gjermanie s cirin di fermà la ambizion sociâl e lavorative dal emigrât, metin fuartis restrizions tai permès di lavôr, tal trasferiment de famee restade in patrie, tal timp di permanence.
L’emigrant, duncje, al traspuarte lis sôs aspetativis di mobilitât sociâl dal paîs di emigrazion al paîs di partence, dulà che al fâs rivâ il sparagn che al ven doprât par comprâ cjamps o par fa une cjase pe famee.
Italiano
English
Furlan